BBGK Team

Dasjoor hets e Wächsel im Organisationskomitée gäh. D Babsi, wo jetzt vier Johr e super Arbet gmacht het, hört uff im Team vom Benefiz-Konzärt. Ihri Uffgobe übernimmt dr Michi, wo sy Talänt und Engagement scho bim Cherusball Therwil het chönne unter Bewies stelle. Neui Lüt bringe immer au neui Idee. Mir sind gspannt.

 

Mir freue uns scho jetzt ufs Jubiläums-Benefiz 2017

Dr Startschuss chunnt bald.....


Bricht im Info-Bulletin

In dr aggduelle Usgoob vom Sternschnuppe Bulletin isch e Brichtli über uns dinne. Mir freue is sehr das mir so viel Unterstützig kha händ vo de Zueschauer und so viel Hälfer, Aggtivi und Sponsore wo das alles Ermöglicht händ!

 

Viele Dangg!!


News von Insieme21

"Ohne Musik wäre das Leben ein Irrtum"
Friedrich Wilhelm Nietzsche 1844 - 1900

Mit dem Spendenbetrag von 2015 konnte Insieme21 Regionalgruppe Basel einen Musikkurs finanzieren und noch weitere Kurse sind in Planung. Wir haben von den Verantwortlichen heute Bilder aus dem Kurs erhalten und sind sehr glücklich, dass das Geld so toll eingesetzt werden kann. Wir hoffen auch in diesem Jahr wieder das eine oder andere bekannte Gesicht an der Fasnacht bei uns begrüssen zu dürfen.

Wir wünschen den Kindern und den Angehörigen eine wunderschöne und musikalische Fasnachtszeit und für die Zukunft nur das Beste.


Spändebetrag 2016

S 2016 dörfe mir als erfolgriechs Johr bezeichne. Zum erschte mol hän mirs widr gschafft an Erfolg vom erschte Johr azknüpfe mit sagehafte

CHF 11'000
wo mir hän chönne and Stiftig Kinderhilfe Sternschnuppe übergeh. DANGGE BASEL und bis im 2017


Dangge Sutter Begg Basel

Mir stuune immer widr, wie viel Untersützig mir erhalte für unsere Event. Was ursprünglich als chleini "Schnapsidee" agfange het, isch mitlerwiele e ussergwöhnliche Event worde, wo Basel zämme stoht und für e gueti Sach öbbis tolls leischtet! 2016 wärde mir zum erschte mol vom Sutter Begg unterstützt. So händ Ihr au d möglichkeit näme Glüehwyy, Bier und Softdrinks, e glaine Happe z ässe! Mir bedangge uns für diä tolli Unterstützig und wünsche e Guete :)


Fotosession

Vo de Horburgschlurbi hän mir das sensationelle Foto bicho. Mir freue uns sehr uf euch!


Rückblick 2015

D Stagecom duet uns immer e wahnsinns Liechttechnik uffbaue. Es gseht jedes mol phantastisch uss! Viele Dangg Stagecom für euri Arbet!

Do e chleine Rückblick vom Basler Benefiz Guggekonzert 2015. Scheen ischs gsy!


8 vo 6'000

Und los....


S Line-Up 2016

Mir freue is riesig ufd Untestüzig vo de insgesammt 164 aktive Fasnächtler wo dä Obe wärde unvergässlich mache. Au dasjoor nach em Motto: "vo Basel fyr Basel"

 

D Ufftritszyte wärde in de nögschte Dag bekannt geh. Aber am beschte Ihr sind eifach vom 18.30 bis am 21.30 uf em Theaterplatz. Mir freue is uf euch und e glatte Obe für dr gueti Zwäck!


Immer widr spannend...

Sit im Juni sind mir bereits widr dra s Benefiz Konzärt z organisiere. Mir hän is scho gfreut das alles so riebigslos lauft... Und denn ischs widr ei mol mehr spannend worde: Unsere plante Termin vom 28.11.2016 isch nit machbar. Zu dere Zyt findet uf dr grosse Bühni vom Theater Basel e Uffführig statt. Klar chönne mir denn nit 50m näbe dra uf dr Stäge schränze.

Es sind uns denn vieli Möglichkeite dure Kopf. E andere Ort, e anders Datum, oder e andere Wuchetag... Da mir uns aber mittlerwyle uf dr Theaterstäge Heimisch fühle, ischs für uns nit in Frog cho, e anderi Location z sueche. (Wär jo au cheibe schad, um dr Häxekaffi im Häxechessel wo uns als Booster für dä Event dient, wenn mr dä nüm in unmittelbarer nöchi hätte)

So hän mir uns für e Datumswächsel entschiede. Es blibt witerhin ufem Theater und witerhin amene Mäntig. Und zwar am

 

12.12.2016

 

Mir freue is sehr uf dä Obe und hoffe das mr au das Johr widr uf euch chönne zelle! Eventuell schaffe mrs jo sogar dasjoor ohni Räge? :-)


10'500.-

Stolz und glücklich dörfe mir euch dr sagehafti Spändebetrag vo:

10'500.- 


bekannt geh. Es isch uns e Ehr gsy, das so viel tolli Guggene uns unterstütz händ. Vo härze e grosses Dangge an alli wo an däm Obe awäsend gsy sind und dä Obe für uns unvergässlich gmacht händ!


Das isch grossartig,

das isch einzigartig,

das isch Basel!


Morn… Die Ruhe vor dem Sturm

E Blick usem Fänschter, Koschtüm paratlege, no diä letschte Telefon tätige. Morn ischs sowit! Ischs nit erscht grad no e halbs Johr gange?! Wo isch denn diä Zyt scho widr ahne. Chunnts numme uns so vor, oder isch diä Wiähnacht jedes Johr friener :-o


Wiä das immer so isch bimene grosse Event wo me alles bis ins Detail dureplant, chunnts denn ganz Anderscht als me dänggt. Dr Andi, unsere Schlagzüger, het sich Geschter s Chnü kaputt gmacht. Somit fallt är uss Morn. Mir wünsche Ihm uf däm Wäg gueti Besserig und halte Ihm e Sitzplatz Frei wenn är doch mag cho.


Mir möchte dä ruhigi Sunntig au no zum Aalass neh, nomol allne z danke wo uns bi däm Event unterstütze. Ihr sind Grossartig und ohni euri Hilf, wär dä Event nit machbar für uns. Vo ganzem Härze dankschön an:

- AVB Reinach

- Em Basler sy Bier

- Stagecom Veranstaltungstechnik

- Jobfactory Print

- Creaplot

- Häxechessel

- TeleBasel

- Tilllate

- Säulikantine

- Basler Wiähnachtsmagazin

- Scholio Graphic and Art Work

- Luggi Grüninger

 

und natürlich allne Guggemusike wo drbi sind und dä Obe wärde unvergässlich mache!


No 3 Dag… nei Halt! No 2 Dag...

28.11.2015


Two days to go… Geschter isch d Dönis diä ganze Mehrwärtbächer go ummechauffiere. In dr Anahm, Plastikbächer chönne jo nit so schwer sie, het sie sich gewaltig dosche. Lägg mr am Tschoope, lieber drei Dag e Kuchi ummetrage als no eimol 10 Kischte Mehrwärtbächer ummeschleppe. Hani natürlich guet rede, da ich jo kei Kuchi muess ummeschleppe :-D


Mir hän uns au nomol getraut ufs Wätter z spicke, gseht jo super uss! Agnähmi 10 Grad und wenns dunkel isch blibts dank de Wolke trotzdäm no bi 8 Grad agnähm warm. Optimal zum loose, danze, trinke, rede und gniesse.


Vorhär hets grad *paling* gmacht und i ha s Foto vo dr Sandra und dr Babsi bicho. Sie sind mit em Christoph go s Flüssige organisiere. Wär s Bier uf däm Foto suecht… Das chunnt imene seperate Laschtwage vom "Basler sy Bier " diräkt :-)


No 4 Dag… 26.11.2015

26.11.2015


Jetzt gots denn also würklich nümmi lang, und es isch höchschti Zyt diä letschte Bsorgige z mache. Damit mr au das Johr widr chönne s Konzärt stimmigsvoll schliesse, sin mr widr uf Zunzge und hän uns dört zwei Vulkän gschnappt. Nach Grüen und Gold wirds dasmol Pink :-)


Denn hän mr hüt no d Yladig bicho bim Telebasel an dr Telebar es Interview geh. Dr Event wird vo dr Denise und vom Luggi (em Moderator) verträtte. "Aussergewöhnliche Menschen, oder Menschen in aussergewöhnlichen Situationen" so wird d Telebar uf dr Homepage vo Telebasel beschriebe. Mir wurde sage, beides trifft zue :-D Mir freue uns druff!


No 5 Dag... 25.11.2015

25.11.2015


Au das Johr macht dr, mit viel liebi dekorierti, Häxechessel für uns und für alli Bsuecher uff am Basler Benefiz Guggekonzärt. Ab de 6i erwarte euch d Häxe mit heissem Häxekaffi bi dr Fächthalle grad näbem Theaterplatz. Mir würde uns sehr freue, zämme mit de Gäscht und de Mitwirkende no e Schlummerdrunk z neh im Häxechessel und uf e glungene Obe azstosse. Für jedes bstellte Geträngg, spände uns d Häxe CHF 1.- für Insieme21. Härzlige Dank!!

25.11.2015


Geschter het sich s OK no für e Sitzig troffe um diä letschte "Kleinigkeite" z kläre. Vom 18.30 bis um Mitternacht sin mr d Arbetsiteilige duregange, hän d Ykaufslischte erstellt und d Route für dr Waretransport feschtgleggt. Dank dr AVB chönne mr alles imene Büssli transportiere und mien nit diversi privati Fahrzüg organisiere. Härzlige Dank!


Wo mr am 12i Znacht us em Restaurant z Rynach cho sind, hets uns ufe Kopf gschneit. Do isch me scho fascht in Wiähnachtsstimmig cho und mir sind froh hän mr uns, trotz eme warme Herbscht, doch für Glüehwyy und nit für Mojito entschiede am Konzärt ;-)


D Sandra und Denise gönd hüt uf Zunzge um unseri Vulkän z kaufe. Au dasjoor wän mr unser Konzärt miteme Fürwärk beände. D Vorfreud stigt....

Mir hän au no e "s11i" gmacht vom OK Team, ganz am schluss und nudlefertig. Do drzue muess me no sage das unsere Presidänt, eidütig besser schwätze als fotografiere cha :-D


No 6 Dag... 24.11.2015

24.11.2015


Hütte ischs Basler Wiähnachtsmagizin usecho und mir händ e Inserat dört inne uf Site 15. Es isch wahnsinnig wiäviel Unterstützig mir vo verschiedenschte Site kriege, das hätte mir uns no vor 2 Johr wos agfange het niä z wünsche gwogt.


Nachdäm mir diä letschte Dag zitteret händ, wills widr nach räge ussgseh het, ischs Hüt zum erschte mol "sunnig" am Mäntig 30.11.2015, das heisst mir luege s Wätter jetzt nümmi a und beharre eifach uf dere Prognose :)

 

Geschter ischs letschte Infoschriebe use an alli beteiligte Gugge und hüte het s OK no diä letschti grossi Sitzig. I möcht mi an dere Stell no ganz härzlich bedanke bi dr Babsi, em Malte, dr Sandra und em Chris, wo Stunde oder sogar Wuche investiert händ, ind Planig und Organisation. Ihr sind FABELHAFT!!